راجع الفرع
كل الدنيا تطورت إلا ربعنا.. يخافون من التطور.. وإذا تطوروا صكوا بحرف تي.. كله كوم وتخلف الكثير من البنوك عندنا كوم.. ومحتاج وقفة طويلة عريضة.. ياحب صرافاتهم لتنقيص حسابك.. واحلم يرجعون لك إلا بعد أربع وعشرين ساعة.. تعامل زي الزفت.. ياخي حنا وش دخلنا إذا مدراء الفروع غثيثين.. ليش تحطون حرتكم فينا.. بعدين والله لو احكي لكم قصتي.. غير تضحكون من قلب.. قلت لازم أتطور.. بسوي هاتف مصرفي.. عشان أشخص قدام المدام.. دقيت على هاتف البنك المجاني.. رد بعد ما طلعت روحي.. قال راجع الفرع.. راجعت الفرع.. موظفين نفوسهم شينه.. ياويلك ياسواد ليلك لو قربت من طاولة موظف البنك.. لأن كاتب أرقام خاصة.. وبعضهم يكون ساهي وهو يكلم ويكتب بعض الكلام اللي صار في الكلام وأنت تبحلق تقرأ.. حطيت الرقم السري.. وكل رقم سري بحياتي أخذوه مني.. عشان يتأكدون مني.. وإذا احتجيت يقولون عشان حمايتك عزيزي العميل.. يصد موظف البنك بوجهه للجهة الثانية عشان تحط رقم سري للبطاقة بزعمهم يقنعونك إنهم حريصين عليك.. تروح لبيتكم.. تحاول تطبق الخدمة.. لايمكن.. تتصل على هاتفهم المجاني يقول لك راجع الفرع.. تراجع الفرع.. يقول لك.. لأن التلفون حقك اللي انت حاطه عندنا ما هو هو نفس التلفون اللي انت تستخدمه.. قلنا يمكن أحد خطفك لبيت ثاني وقام يبي يضحك علينا ويسرقك.. وباخر حلقات المسلسل المكسيكي إن حاميها حراميها.. والدعوة كلها كل فطير وطير..
